ഷാർജ: അസ്ഥിര കാലാവസ്ഥ മൂലം പൊതു പാർക്കിങ് ഫീസ് ഇളവ് അടുത്ത അറിയിപ്പ് ഉണ്ടാകുന്നതുവരെ നീട്ടിയതായി ഷാർജ. മാർച്ച് 23 ന് നടപ്പാക്കിയ പാർക്കിങ് ഫീസ് ഇളവാണ് നീട്ടിയത്. ഷാർജ എമിറേറ്റിലെ എല്ലാ പൊതു പാർക്കിങ് ഏരിയകളിലും ഈ ഇളവ് ലഭിക്കുമെന്ന് ഷാർജ സിറ്റി മുനിസിപ്പാലിറ്റി അറിയിച്ചു. നീല ചിഹ്നങ്ങളുള്ള, സാധാരണയായി നിരക്ക് ഈടാക്കുന്ന മേഖലകൾ ഉൾപ്പെടെയാണിത്. എന്നാൽ സ്മാർട്ട് പാർക്കിങ് യാർഡുകളിൽ ഈ ഇളവ് ലഭ്യമല്ല.

ഒരു ആഴ്ച യുഎഇയിൽ അസ്ഥിര കാലാവസ്ഥയാണ് പ്രതീക്ഷിക്കുന്നത്. വെള്ളി വരെ രാജ്യത്തിന്റെ വിവിധ പ്രദേശങ്ങളിൽ മഴയുണ്ടാകുമെന്നാണ് നാഷണൽ സെന്റർ ഓഫ് മെറ്റീരിയോളജി (എൻസിഎം) പ്രവചിക്കുന്നത്. ദൂരക്കാഴ്ച കുറവായിരിക്കുമ്പോഴും റോഡുകളിൽ വെള്ളം കെട്ടിക്കിടക്കുമ്പോഴും വാഹനമോടിക്കുന്നവർ ജാഗ്രത പാലിക്കണമെന്നാണ് നിർദേശം.