അബുദാബി : അബുദാബിയിലെ ഷെയ്ഖ് ഷാഖ്ബൂത്ത് മെഡിക്കൽ സിറ്റിയിലെ (SSMC) ഡോക്ടർമാർ രാജ്യത്തെ ആദ്യത്തെ റോബോട്ടിക് തൈറോയ്ഡ് ശസ്ത്രക്രിയ വിജയകരമായി പൂർത്തിയാക്കി. 27 കാരിയായ രോഗിയാണ് ശസ്ത്രക്രിയയ്ക്ക് ശേഷം തൊട്ടടുത്ത ദിവസം തന്നെ ആശുപത്രി വിട്ടത്. കഴുത്തിന്റെ മുൻഭാഗത്ത് മുറിവുണ്ടാക്കുന്ന പരമ്പരാഗത രീതിക്ക് പകരം, കക്ഷത്തിന് താഴെ ചെറിയ മുറിവുകളിലൂടെ ശസ്ത്രക്രിയ നടത്താൻ ഈ റോബോട്ടിക് സാങ്കേതികവിദ്യ സഹായിക്കുന്നു.

കഴുത്തിൽ പാടുകൾ  വീഴുന്നത് ഒഴിവാക്കാൻ ഇത് സഹായിക്കുന്നു. കൂടാതെ, ശസ്ത്രക്രിയ കൂടുതൽ കൃത്യതയോടും സുരക്ഷിതത്വത്തോടും കൂടി പൂർത്തിയാക്കാൻ സർജന്മാർക്ക് സാധിക്കുകയും ചെയ്യും. കഴുത്തിലെ വീക്കം കാരണം ഭക്ഷണം വിഴുങ്ങാൻ ബുദ്ധിമുട്ടും ഉറങ്ങുമ്പോൾ ശ്വാസംമുട്ടലും അനുഭവപ്പെട്ടതിനെ തുടർന്നാണ് കരോലിൻ എന്ന യുവതി ചികിത്സ തേടിയത്. പരിശോധനയിൽ ഇവരുടെ തൈറോയ്ഡ് ഗ്രന്ഥിയുടെ ഇടതുവശത്തായി 3 സെന്റീമീറ്റർ വലിപ്പമുള്ള തടസ്സം  കണ്ടെത്തിയിരുന്നു. ശസ്ത്രക്രിയയ്ക്ക് ശേഷം വേഗത്തിൽ സുഖം പ്രാപിച്ച യുവതി അടുത്ത ദിവസം തന്നെ ആശുപത്രി വിട്ടു.