അബുദാബി: അബുദാബി ഇന്ത്യ സോഷ്യൽ ആൻഡ് കൾച്ചറൽ സെന്ററിലെ (ഐ.എസ്.സി) പ്രൊഫഷണൽസ് ആൻഡ് ഓൺട്രപ്രണേഴ്സ് ഫോറം (ഐ.പി.ഇ.എഫ്) സംഘടിപ്പിച്ച “ചായ് പേ ചർച്ച – സക്സസ്ഫുൾ ലീഡർ സീരീസ്” നടന്നു.ഐ.എസ്.സി മെയിൻ ഹാളിൽ നടന്ന ചടങ്ങിൽ പ്രമുഖ ബിസിനസ്സ് നേതാക്കളും സംരംഭകരും തങ്ങളുടെ അനുഭവങ്ങൾ പങ്കുവെച്ചു. നേതൃപാടവം, പ്രതിസന്ധികളെ അതിജീവിക്കാനുള്ള കരുത്ത്, ബിസിനസ്സ് വളർച്ച എന്നീ വിഷയങ്ങളിൽ ഊന്നൽ നൽകിയായിരുന്നു സെഷനുകൾ. ഐ.എസ്.സി ജനറൽ ഗവർണറും അൽ റഖാ ഗ്രൂപ്പ് മാനേജിംഗ് ഡയറക്ടറുമായ ഡോ. സുർജൻ സിംഗ്, ഐ.എസ്.സി ജനറൽ ഗവർണറും മെട്രോ കോൺട്രാക്റ്റിംഗ് കമ്പനി മാനേജിംഗ് ഡയറക്ടറുമായ ജോൺ സാമുവൽ, ഐ.എസ്.സി ജനറൽ ഗവർണറും അൽ നസർ ജനറൽ സർവീസസ് മാനേജിംഗ് ഡയറക്ടറുമായ സുദർശൻ രാജൻ (രാജൻ അമ്പലത്തറ), ക്യാപിറ്റൽ എൻജിനീയറിങ് കൺസൾട്ടൻസി സ്ഥാപകനും മാനേജിംഗ് ഡയറക്ടറുമായ  ബാലസ്കന്ദൻ രഘുനാഥൻ എന്നിവർ മുഖ്യപ്രഭാഷകരായിരുന്നു.

തങ്ങളുടെ ബിസിനസ്സ് ജീവിതത്തിലെ ആദ്യകാല അനുഭവങ്ങൾ, വഴിത്തിരിവുകൾ, നേരിട്ട വെല്ലുവിളികൾ, വിജയത്തിനായി സ്വീകരിച്ച തന്ത്രങ്ങൾ എന്നിവയെക്കുറിച്ച് പ്രഭാഷകർ തുറന്നു സംസാരിച്ചു. വളർന്നുവരുന്ന സംരംഭകർക്കും പ്രൊഫഷണലുകൾക്കും ഏറെ പ്രായോഗികമായ ഉപദേശങ്ങളാണ് ഇവർ നൽകിയത്. ഐ.പി.ഇ.എഫ് ചെയർമാൻ കുഞ്ചേറിയ പഞ്ഞിക്കാരൻ സ്വാഗതം ആശംസിച്ചു. ഈ വർഷം ശ്രദ്ധേയവും നൂതനവുമായ പരിപാടികൾ സംഘടിപ്പിച്ച ഐ.പി.ഇ.എഫ് ഗവേണിംഗ് ബോഡിയെ ഐ.എസ്.സി പ്രസിഡന്റ്  ജയചന്ദ്രൻ നായർ അഭിനന്ദിച്ചു. പ്രൊഫഷണൽ-ബിസിനസ്സ് സമൂഹത്തിന് ഫോറം നൽകുന്ന പിന്തുണയെ ഐ.എസ്.സി ജനറൽ സെക്രട്ടറി  സത്യ ബാബു പ്രശംസിച്ചു.

ഐ.എസ്.സി വൈസ് പ്രസിഡന്റും ഐ.പി.ഇ.എഫ് തലവനുമായ ഷാജി വി. കെ. ചടങ്ങിന്റെ ലക്ഷ്യങ്ങളെക്കുറിച്ചും കാഴ്ചപ്പാടുകളെക്കുറിച്ചും വിശദീകരിച്ചു. അറിവ് പങ്കുവെക്കാനും വിജയഗാഥകൾ മറ്റുള്ളവർക്ക് പ്രചോദനമാകാനും ഇത്തരം വേദികൾ അത്യന്താപേക്ഷിതമാണെന്ന് അദ്ദേഹം പറഞ്ഞു.
ഐ.പി.ഇ.എഫ് യൂത്ത് വിംഗ് ലീഡർ അഗ്രത സുജിത്ത് മോഡറേറ്ററായി സെഷൻ നിയന്ത്രിച്ചു. ഐ.എസ്.സി അംഗങ്ങളും ബിസിനസ്സ് പ്രതിനിധികളും ഉൾപ്പെടെ വൻ ജനപങ്കാളിത്തമാണ് ചടങ്ങിൽ ഉണ്ടായത്. പരിപാടിയുടെ സ്പോൺസർമാരായ ജർമ്മൻ ഗൾഫ് അബുദാബി, ക്യാപിറ്റൽ എൻജിനീയറിങ് കൺസൾട്ടൻസി , സ്പിന്നീസ് എന്നിവർക്ക് സംഘാടകർ നന്ദി രേഖപ്പെടുത്തി. പ്രഭാഷകർക്കും മോഡറേറ്റർക്കും സ്പോൺസർമാർക്കും ഉപഹാരങ്ങൾ സമർപ്പിച്ചു.സമൂഹത്തിൽ സംരംഭകത്വം വളർത്തുന്നതിനും പ്രൊഫഷണലുകളുടെ പുരോഗതിക്കുമായി ഇനിയും ഇത്തരം മികച്ച പരിപാടികൾ സംഘടിപ്പിക്കുമെന്ന് ഐ.പി.ഇ.എഫ് അറിയിച്ചു.