ദുബായ്: യുഎഇയിലെ ഇന്ത്യൻ പാസ്​പോർട്ട്​-വിസ സേവന കേന്ദ്രങ്ങളിൽ നാലെണ്ണം ഇന്ന്​ മുതൽ പ്രവർത്തിക്കില്ല. മുസഫ, അൽ റീം, ദുബായ് ഇൻവെസ്റ്റ്മെന്‍റ്​ പാർക്ക്-1, ഷാർജ അൽ മജാസ്  എന്നിവിടങ്ങളിലെ സേവന കേ​ന്ദ്രങ്ങൾ ഇന്ന്​ മുതൽ പ്രവർത്തിക്കില്ലെന്ന്​ ഇന്ത്യൻ എംബസിയാണ്​ അറിയിച്ചത്​. ആകെ 16 പാസ്​പോർട്ട്​- വിസ ​സേവന ​കേന്ദ്രങ്ങളാണ്​ യുഎഇയിൽ ഉണ്ടായിരുന്നത്​. നാലെണ്ണം നിർത്തിയതോടെ സേവന കേന്ദ്രങ്ങളുടെ എണ്ണം 12 ആയി കുറഞ്ഞു. പാസ്പോർട്ട്, വിസ, സാക്ഷ്യപ്പെടുത്തൽ സേവനങ്ങൾ ‘അൽ ഹിന്ദ് ടൂർസ് ആൻഡ് ട്രാവൽസിന്’ ഔട്ട്സോഴ്സ് ചെയ്തതുമുതൽ എമിറേറ്റുകളിലായി ആകെ 16 കേന്ദ്രങ്ങളാണ് പ്രവർത്തിച്ചിരുന്നത്. ഭരണപരമായ കാരണങ്ങളാലാണ്​നാല് കേന്ദ്രങ്ങളിലെയും സേവനങ്ങൾ നിർത്തിവെക്കുന്നതെന്നാണ്​ അധികൃതർ അറിയിച്ചിരിക്കുന്നത്​. അൽ ദാന, അൽ ഐൻ, മദീനത് സായിദ്, അൽ ദഫ്​റ, ഗയാതി, ബുർ ദുബൈ, ഇന്ത്യൻ അസോസിയേഷൻ ഷാർജ, അജ്മാൻ, ഉമ്മുൽ ഖുവൈൻ, റാസൽഖൈമ, ഫുജൈറ, കൽബ, ഖോർഫുക്കാൻ എന്നിവിടങ്ങളിലെ കേന്ദ്രങ്ങൾ പതിവുപോലെ സേവനങ്ങൾ തുടർന്നു നൽകും. 12 കേന്ദ്രങ്ങളും രാവിലെ എട്ട്​ മുതൽ വൈകുന്നേരം ആറ്​ വരെ പ്രവർത്തിക്കും.തത്കാൽ പാസ്‌പോർട്ട് സേവനങ്ങൾ, നവജാത ശിശുക്കളുടെ അപേക്ഷകൾ, എമർജൻസി സർട്ടിഫിക്കറ്റ് (ഇ.സി.) അപേക്ഷകൾ, മുതിർന്ന പൗരന്മാർ എന്നിവർക്ക്​ വാക്ക്​ ഇൻ അപേക്ഷ നൽകാം.