മനാമ : ബഹ്‌റൈൻ തലസ്ഥാനമായ മനാമയിലെ ജനവാസമേഖലയിൽ ഇറാൻ നടത്തിയ ഭീകരാക്രമണത്തിൽ ഒരാൾ കൊല്ലപ്പെട്ടു. ആക്രമണത്തിൽ ഒട്ടേറെ പേർക്ക് പരുക്കേറ്റതായും ബഹ്‌റൈൻ ആഭ്യന്തര മന്ത്രാലയം സ്ഥിരീകരിച്ചു. സമാധാനാന്തരീക്ഷം പുലരുന്ന നഗരത്തിലെ ഒരു പാർപ്പിട സമുച്ചയത്തെ ലക്ഷ്യമിട്ടുണ്ടായ ആക്രമണം വലിയ ഞെട്ടലാണ് സൃഷ്ടിച്ചിരിക്കുന്നത്.യാതൊരു പ്രകോപനവുമില്ലാതെ, സാധാരണക്കാർ താമസിക്കുന്ന കെട്ടിടത്തിലേക്ക് നടന്ന ആക്രമണം മേഖലയിൽ വലിയ സുരക്ഷാ ഭീഷണിയാണ് ഉയർത്തിയിരിക്കുന്നത്. സംഭവസ്ഥലത്ത് അടിയന്തര സേവന വിഭാഗങ്ങൾ എത്തി രക്ഷാപ്രവർത്തനങ്ങൾ ഊർജിതമാക്കി. പരുക്കേറ്റവരെ വിവിധ ആശുപത്രികളിലേക്ക് മാറ്റിയിട്ടുണ്ട്. നിരപരാധികളായ മനുഷ്യർ താമസിക്കുന്ന ഇടം ലക്ഷ്യമാക്കി നടന്ന ഈ കടന്നുകയറ്റം രാജ്യാന്തര തലത്തിൽ വലിയ പ്രതിഷേധത്തിന് വഴിവെച്ചിരിക്കുകയാണ്. മേഖലയുടെ സുസ്ഥിരതയെ തകർക്കാനും ഭീതി പരത്താനും ഉദ്ദേശിച്ചുള്ള ഇത്തരം നീക്കങ്ങൾക്കെതിരെ ശക്തമായ നടപടികൾ വേണമെന്ന ആവശ്യം ഉയരുന്നു.