ഖത്തറിലെ ജനറൽ ഡയറക്ടറേറ്റ് ഓഫ് ക്രിമിനൽ ഇൻവെസ്റ്റിഗേഷനിലെ ഇക്കണോമിക് ആൻഡ് സൈബർ ക്രൈംസ് കോംബാറ്റിംഗ് ഡിപ്പാർട്ട്‌മെന്റാണ് ഈ അറസ്റ്റ് രേഖപ്പെടുത്തിയത്. ആഭ്യന്തര മന്ത്രാലയത്തിന്റെ നിർദ്ദേശങ്ങൾ ലംഘിച്ചും ഔദ്യോഗിക വിവരങ്ങൾ വളച്ചൊടിച്ചും സോഷ്യൽ മീഡിയ വഴി ദൃശ്യങ്ങൾ പങ്കുവെച്ചവർക്കെതിരെയാണ് കർശന നടപടി സ്വീകരിച്ചിരിക്കുന്നത്.

മേഖലയിലെ സുരക്ഷാ സാഹചര്യങ്ങളുടെ പശ്ചാത്തലത്തിൽ ചില നിയന്ത്രണങ്ങൾ നിലനിൽക്കെയാണ് ഈ അറസ്റ്റുകൾ നടന്നത്. പിടിയിലായവർക്കെതിരെ നിയമനടപടികൾ ആരംഭിച്ചിട്ടുണ്ട്. നിലവിലെ സുരക്ഷാ സാഹചര്യങ്ങളുമായോ ഫീൽഡ് നടപടികളുമായോ ബന്ധപ്പെട്ട ദൃശ്യങ്ങൾ ചിത്രീകരിക്കുന്നതിനോ, പങ്കുവെക്കുന്നതിനോ, കിംവദന്തികൾ പ്രചരിപ്പിക്കുന്നതിനോ എതിരെ ആഭ്യന്തര മന്ത്രാലയം മുന്നറിയിപ്പ് നൽകി. ഔദ്യോഗിക സ്രോതസ്സുകളിൽ നിന്നുള്ള വിവരങ്ങൾ മാത്രം വിശ്വസിക്കണമെന്നും വ്യാജവാർത്തകൾ പ്രചരിപ്പിക്കരുതെന്നുമുള്ള നിർദ്ദേശം മന്ത്രാലയം പൊതുജനങ്ങളോട് ആവർത്തിച്ചു.